ಕಳೆದ ಚುನಾವಣೆಯಲ್ಲಿ ಸೋಲಿನ ಬಳಿಕ ಮತ್ತೆ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಕಣಕ್ಕಿಳಿಯಲು ಬಯಸಿರುವ ಡೊನಾಲ್ಡ್ ಟ್ರಂಪ್, ನೀಲಿ ಚಿತ್ರ ತಾರೆಗೆ ಕಳ್ಳ ಹಣ ನೀಡಿದ ಸಂಗತಿ ಸಂಚಲನ ಮೂಡಿಸಿದೆ. 2016ರ ಅಮೆರಿಕ ಚುನಾವಣೆಗೂ ಮುನ್ನ ನೀಲಿ ಚಿತ್ರ ತಾರೆ ಸ್ಟಾರ್ಮಿ ಡೇನಿಯಲ್ಸ್ ಅವರಿಗೆ ಗುಟ್ಟಾಗಿ ಹಣ ನೀಡಿದ ಅಪರಾಧ ಪ್ರಕರಣದಲ್ಲಿ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಬಂಧನ ಭೀತಿ ಎದುರಾಗಿದೆ. ತಮ್ಮ ಹಗರಣವೊಂದರಿಂದ ಬಚಾವಾಗಲು ಟ್ರಂಪ್ ಅವರು ಸ್ಟಾರ್ಮಿ ಅವರಿಗೆ ಗೋಪ್ಯವಾಗಿ ದುಡ್ಡು ಕೊಟ್ಟಿದ್ದರು ಎಂದು ಆರೋಪಿಸಲಾಗಿದೆ.ಒಂದು ಕಾಲದಲ್ಲಿ ವಯಸ್ಕರ ಸಿನಿಮಾಗಳಿಂದ ‘ಪ್ರಖ್ಯಾತಿ’ ಗಳಿಸಿದ್ದ ಸ್ಟಾರ್ಮಿ ಡೇನಿಯಲ್ಸ್, ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಜತೆಗಿನ ಸಂಬಂಧದಿಂದಲೂ ಅಮೆರಿಕ ಹಾಗೂ ಜಗತ್ತಿನಾದ್ಯಂತ ಸುದ್ದಿಯಾಗಿದ್ದರು. ಸ್ವತಃ ಟ್ರಂಪ್ ಅವರೇ ಆಕೆಯನ್ನು ಸಾರ್ವಜನಿಕವಾಗಿ ಪರಿಚಯಿಸಿದ್ದರು.
ನೀಲಿ ಸಿನಿಮಾಗಳಿಗೆ ಹೆಸರಾಗಿದ್ದ ಅಮೆರಿಕದ ಸ್ಟಾರ್ಮಿ ಡೇನಿಯಲ್ಸ್ ಅವರ ಮೂಲ ಹೆಸರು ಸ್ಟಿಫಾನಿ ಗ್ರೆಗರಿ ಕ್ಲಿಫರ್ಡ್. ಕ್ಯಾಲಿಫೋರ್ನಿಯಾ ಮತ್ತು ನೆವಾಡ ನಡುವಿನ ಗಡಿಯಲ್ಲಿನ ತಾಹೋಯ್ ಸರೋವರದಲ್ಲಿ 2006ರಲ್ಲಿ ನಡೆದ ಗಾಲ್ಫ್ ಟೂರ್ನಮೆಂಟ್ ಒಂದರಲ್ಲಿ ರಿಯಲ್ ಎಸ್ಟೇಟ್ ದಿಗ್ಗಜ ಡೊನಾಲ್ಡ್ ಟ್ರಂಪ್ ಅವರನ್ನು ಮೊದಲ ಬಾರಿಗೆ ಭೇಟಿ ಮಾಡಿದ್ದಾಗಿ ಸ್ಟಾರ್ಮಿ ತಿಳಿಸಿದ್ದಾರೆ.ಆಗಷ್ಟೇ ಸ್ಟಾರ್ಮಿ ಡೇನಿಯಲ್ಸ್, ಜುಡ್ ಅಪಾಟೊವ್ ಅವರ ‘ದಿ 40 ಇಯರ್ಸ್ ವರ್ಜಿನ್’ ಎಂಬ ಸಿನಿಮಾದಲ್ಲಿ ಚಿಕ್ಕ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಟ್ರಂಪ್ ಅವರ ಭೇಟಿ ಸಂದರ್ಭದಲ್ಲಿ ಸ್ಟಾರ್ಮಿ ಅವರಿಗೆ 27 ವರ್ಷವಾಗಿದ್ದರೆ, ಟ್ರಂಪ್ ಅವರಿಗೆ 60 ವರ್ಷ.
ಟ್ರಂಪ್ ಅವರು ತಮ್ಮನ್ನು ಡಿನ್ನರ್ಗೆ ಆಹ್ವಾನಿಸಿದ್ದರು. ಪೈಜಾಮದಲ್ಲಿದ್ದ ಟ್ರಂಪ್ ತಮ್ಮನ್ನು ಸ್ವಾಗತಿಸಿದ್ದರು ಎಂದು ಸ್ಟಾರ್ಮಿ ತಿಳಿಸಿದ್ದಾರೆ. ಅಷ್ಟೇ ಅಲ್ಲದೆ, ತಾವು ತಮ್ಮ ಅನುಭವದಲ್ಲಿ ಹೊಂದಿದ ಅತ್ಯಂತ ಕೆಟ್ಟ ಸೆಕ್ಸ್ ಅದಾಗಿರಬಹುದು ಎಂದು ಅವರು ಹೇಳಿಕೊಂಡಿದ್ದಾರೆ. ಇದನ್ನು ಅವರು ‘ಫುಲ್ ಡಿಸ್ಕ್ಲೋಸರ್’ ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ. ಆಕೆ ಜತೆ ತಾವು ಯಾವುದೇ ಲೈಂಗಿಕ ಸಂಬಂಧ ಹೊಂದಿರಲಿಲ್ಲ ಎಂದಿರುವ ಟ್ರಂಪ್, ಆಕೆ ಸುಲಿಗೆ ಮಾಡುತ್ತಿದ್ದಾರೆ ಮತ್ತು ಆಕೆಯ ಹೇಳಿಕೆಗಳು ಸಂಪೂರ್ಣ ವಂಚಕರ ಕೆಲಸವಾಗಿದೆ ಎಂದು ಆರೋಪಿಸಿದ್ದಾರೆ.
ಟ್ರಂಪ್ ಅವರು 2016ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ರಿಪಬ್ಲಿಕನ್ ಅಭ್ಯರ್ಥಿಯಾಗಿ ಕಣಕ್ಕಿಳಿಯಲು ತಯಾರಿ ನಡೆಸುವ ಕೊಂಚ ಮುನ್ನವಷ್ಟೇ ಸ್ಟಾರ್ಮಿ ಅವರಿಗೆ ಟ್ರಂಪ್ 1.30 ಲಕ್ಷ ಡಾಲರ್ ನೀಡಿದ್ದರು ಎನ್ನಲಾಗಿದೆ.ಕಳೆದ ವರ್ಷ ಸ್ಟಾರ್ಮಿ ವಯಸ್ಕರ ಚಿತ್ರ ನಟ ಬಾರೆಟ್ ಬ್ಲೇಡ್ ಜತೆ ನಾಲ್ಕನೇ ಮದುವೆಯಾಗಿದ್ದರು. ಲೂಸಿಯಾನಾದ ಬೇಟನ್ ರೌಗ್ನಲ್ಲಿ ಬೆಳೆದ ಸ್ಟಾರ್ಮಿ, ಹಣ ಸಂಪಾದಿಸಲು ಸಾಧಿಸಲು ಹೈಸ್ಕೂಲು ದಿನಗಳಲ್ಲಿಯೇ ಕ್ಲಬ್ಗಳಲ್ಲಿ ಮಾದಕ ನೃತ್ಯಗಳನ್ನು ಮಾಡುತ್ತಿದ್ದರು ಎಂದು ದಿ ಗಾರ್ಡಿಯನ್ ವರದಿ ಮಾಡಿದೆ.
2006ರಲ್ಲಿ ನಡೆದ ಟ್ರಂಪ್ ಮತ್ತು ಸ್ಟಾರ್ಮಿ ಭೇಟಿಯನ್ನು ಮುಚ್ಚಿ ಹಾಕಲು 1.30 ಲಕ್ಷ ಡಾಲರ್ ರುಸುಮು ಹಣವನ್ನು ನೀಡಲಾಗಿತ್ತು ಎಂಬುದನ್ನು ಟ್ರಂಪ್ ಅವರ ಖಾಸಗಿ ವಕೀಲರು ಕೂಡ ಒಪ್ಪಿಕೊಂಡಿದ್ದಾರೆ.