ಇಸ್ಲಾಮಿಕ್ ಸಂಪ್ರದಾಯದ ಪ್ರಕಾರ, ಮಸೀದಿಗಳು ವಿಶ್ವಾಸಿಗಳಿಗೆ ಅಲ್ಲಾಹನ ಆರಾಧನೆಗೆ ಮತ್ತು ಪ್ರಾರ್ಥನೆಗೆ ಮಾತ್ರ ಮೀಸಲಾದ ಪವಿತ್ರ ಸ್ಥಳಗಳಾಗಿವೆ.ಮಸೀದಿಗಳ ಪಾವಿತ್ರ್ಯತೆ ಮತ್ತು ಅವುಗಳೊಳಗಿನ ಆರಾಧಕರ ಸರಿಯಾದ ನಡವಳಿಕೆಯ ಬಗ್ಗೆ ಕುರಾನ್ ಮತ್ತು ಹದೀಸ್ನ ಬೋಧನೆಗಳನ್ನು ಸದಾ ನೆನಪಿನಲ್ಲಿಟ್ಟುಕೊಂಡು, ಮಸೀದಿಯ ಪಾವಿತ್ರ್ಯತೆಯನ್ನು ಕಾಪಾಡಿಕೊಂಡು ಬರುವುದು, ಮುಸ್ಲಿಮರಾದ ನಮ್ಮ ಕರ್ತವ್ಯ. ಮಸೀದಿಗಳು ಶಾಂತಿಯ ಪ್ರತಿಬಿಂಬ ಹಾಗೂ ಅಲ್ಲಾಹನ ಮೇಲಿನ ಭಯಭಕ್ತಿಯ ಹಾಗೂ ಅಲ್ಲಾಹನ ಅನುಗ್ರಹದ ಅಭಯ ಸ್ಥಾನಗಳೆಂಬುದನ್ನು ನಾವು ಎಂದಿಗೂ ಮರೆಯಬಾರದು.
ಆದರೆ ಇತ್ತೀಚಿನ ದಿನಗಳಲ್ಲಿ, ಮಸೀದಿಯ ಪ್ರಾರ್ಥನೆಯ ಸಮಯದಲ್ಲಿ, ವಿಶೇಷವಾಗಿ ರಂಜಾನ್ನಲ್ಲಿ ತರಾವೀಹ್ ಪ್ರಾರ್ಥನೆಯ ಸಮಯದಲ್ಲಿ ಕೆಲವೊಂದು ವ್ಯಕ್ತಿಗಳು ವಿಚ್ಛಿದ್ರಕಾರಕ ನಡವಳಿಕೆಯಲ್ಲಿ ತೊಡಗುವ ಪ್ರವೃತ್ತಿ ಕಂಡುಬಂದಿದೆ. ಸ್ನೇಹಿತರೆಲ್ಲ ಮಸೀದಿಯ ಒಂದೇ ಲೈನಿನಲ್ಲಿ ಪ್ರಾರ್ಥನೆಗೆ ನಿಂತು ಕುಹಕಗಳನ್ನಾಡುತ್ತಾ ಇತರ ನಮಾಜಿಗಳಿಗೆ ತೊಂದರೆ ನೀಡುವುದು, ಮಸೀದಿಯೊಳಗೆ ಮೊಬೈಲ್ ಗಳಲ್ಲಿ ಮಾತನಾಡುವುದು, ವಾಟ್ಸಪ್ಪ್ ಚಾಟ್ ಗಳಲ್ಲಿ ನಿರತರಾಗಿರುವುದು, ವಿಡಿಯೋ ತುಣುಕುಗಳನ್ನು ನೋಡುವುದು ಇತ್ಯಾದಿ ಚಟುವಟಿಕೆಗಳು ಕಂಡುಬರುತ್ತಿವೆ. ಆದರೆ ಕೆಲವೊಂದು ಮಸೀದಿಗಳಲ್ಲಿ ಇಮಾಮರು ಹಾಗೂ ಆಡಳಿತ ವರ್ಗ ಈ ಬಗ್ಗೆ ತಿಳಿದೋ, ತಿಳಿಯದೆಯೋ, ಈ ಬಗ್ಗೆ ಏನೊಂದು ಚಕಾರವೆತ್ತದೆ ಇರುವುದು ವಿಪರ್ಯಾಸ.
ಕುರಾನ್ ಪ್ರಾರ್ಥನೆಯ ಸಮಯದಲ್ಲಿ ಗೌರವ ಮತ್ತು ಪ್ರಾರ್ಥನೆಯ ಮೇಲೆ ಗಮನ ಗಮನ ಕೇಂದ್ರೀಕರಿಸುವ ಮಹತ್ವದ ಬಗ್ಗೆ ಒತ್ತಿ ಹೇಳುತ್ತದೆ. ಕುರಾನಿನ ಸುರಾ ಅಲ್-ಅರಾಫ್ (7:31) ರಲ್ಲಿ ಅಲ್ಲಾಹನು ಹೇಳುತ್ತಾನೆ, ಆದಮ್ರ ಸಂತತಿಗಳೇ, ನೀವು ನಿಮ್ಮ ಎಲ್ಲಾ ಆರಾಧನಾ ಸ್ಥಳಗಳಲ್ಲಿ ನಿಮ್ಮ ಅಲಂಕಾರಗಳನ್ನು ಧರಿಸಿರಿ. ತಿನ್ನಿರಿ ಮತ್ತು ಕುಡಿಯಿರಿ. ಆದರೆ ದುಂದುವೆಚ್ಚ ಮಾಡಬೇಡಿರಿ. ಖಂಡಿತವಾಗಿಯೂ ಅವನು ದುಂದುವೆಚ್ಚ ಮಾಡುವವರನ್ನು ಮೆಚ್ಚುವುದಿಲ್ಲ. ಈ ಸೂಕ್ತವು ಮಸೀದಿಯೊಳಗಿನ ನಮ್ರತೆ ಮತ್ತು ವಿನಮ್ರತೆಯ ಮಹತ್ವವನ್ನು ಎತ್ತಿ ತೋರಿಸುತ್ತದೆ, ಗೊಂದಲ ಮತ್ತು ಅನಗತ್ಯ ವಟಗುಟ್ಟುವಿಕೆಯಿಂದ ದೂರವಿರಲು ವಿಶ್ವಾಸಿಗಳನ್ನು ಒತ್ತಾಯಿಸುತ್ತದೆ.
ಇದಲ್ಲದೆ, ಪ್ರವಾದಿ ಮುಹಮ್ಮದ್ (ಸ.ಅ.) ರವರ ಹದೀಸಿನಲ್ಲಿ ಮಸೀದಿಗಳಲ್ಲಿ ವಿಶ್ವಾಸಿಗಳಿಂದ ಅಪೇಕ್ಷಿತ ಹಾಗೂ ನಿರೀಕ್ಷಿತ ನಡವಳಿಕೆಯ ಬಗ್ಗೆ ಸ್ಪಷ್ಟ ಮಾರ್ಗದರ್ಶನವನ್ನು ನೀಡುತ್ತದೆ. ಪ್ರವಾದಿ (ಸ) ಹೇಳಿದರು, ಯಾರಾದರೂ ಮಸೀದಿಗೆ ಪ್ರವೇಶಿಸಿದರೆ, ಅವನು ಎರಡು ರಕಾತ್ ನಮಾಝ್ ಮಾಡುವವರೆಗೆ ಕುಳಿತುಕೊಳ್ಳಬಾರದು. (ಸಹೀಹ್ ಬುಖಾರಿ) . ಈ ಹದೀಸ್ ಮಸೀದಿಯನ್ನು ಪ್ರವೇಶಿಸಿದ ನಂತರ ಪ್ರಾರ್ಥನೆಯಲ್ಲಿ ತೊಡಗಿಸಿಕೊಳ್ಳುವ ಪ್ರಾಮುಖ್ಯತೆಯನ್ನು ಸ್ಪಷ್ಟ ನಿರ್ದೇಶನವನ್ನು ನೀಡುತ್ತದೆ. ನಿಷ್ಫಲ, ನಿಷ್ಪ್ರಯೋಜಕ ಸಂಭಾಷಣೆ ಅಥವಾ ಗೊಂದಲಕ್ಕಿಂತ ಅಲ್ಲಾಹನ ಆರಾಧನೆಗೆ ಮಾತ್ರ ಅವಕಾಶವಿದೆ ಎಂಬುವುದನ್ನು ನಾವು ಮರೆಯಬಾರದು.
ಪ್ರವಾದಿ (ಸ.ಅ.) ರವರು ವಿಶ್ವಾಸಿಗಳಿಗೆ ಮಸೀದಿಯೊಳಗೆ ಲೌಕಿಕ ವಿಷಯಗಳಲ್ಲಿ ತೊಡಗಿಸಿಕೊಳ್ಳದಂತೆ ಎಚ್ಚರಿಕೆ ನೀಡಿದರು. ಪ್ರವಾದಿ (ಸ.ಅ.)ರವರು ಮಸೀದಿಯಲ್ಲಿ ಯಾರಾದರೂ ಖರೀದಿಸುವುದನ್ನು ಅಥವಾ ಮಾರಾಟ ಮಾಡುವುದನ್ನು ನೀವು ನೋಡಿದರೆ, ಅವನಿಗೆ ಹೇಳಿ, ‘ಅಲ್ಲಾಹನು ನಿಮ್ಮ ವ್ಯಾಪಾರವನ್ನು ಲಾಭದಾಯಕವಲ್ಲದಂತೆ ಮಾಡಲಿ ! (ಸುನನ್ ಇಬ್ನ್ ಮಾಜಾ). ಈ ಹದೀಸ್ ಮಸೀದಿಯನ್ನು ಕೇವಲ ಅಲ್ಲಾಹನ ಆರಾಧನೆ, ಸ್ಮರಣೆ ಮತ್ತು ಆಧ್ಯಾತ್ಮಿಕ ಅನ್ವೇಷಣೆಗಳಿಗೆ ಮಾತ್ರ ಮೀಸಲಾದ ಸ್ಥಳವಾಗಿ ಸಂರಕ್ಷಿಸುವ ಮಹತ್ವವನ್ನು ಒತ್ತಿಹೇಳುತ್ತದೆ.
ಇದಲ್ಲದೆ, ಪ್ರವಾದಿ ಮುಹಮ್ಮದ್ (ಸ.ಅ.)ರವರು ಪ್ರಾರ್ಥನೆಯ ಸಮಯದಲ್ಲಿ ಗಮನ ಮತ್ತು ಏಕಾಗ್ರತೆಯನ್ನು ಕಾಪಾಡಿಕೊಳ್ಳುವ ಮಹತ್ವವನ್ನು ಒತ್ತಿಹೇಳಿದರು. ಮುಹಮ್ಮದ್ (ಸ.ಅ.)ರವರು, ನೀವು ಪ್ರಾರ್ಥನೆ ಮಾಡಲು ಎದ್ದು ನಿಂತಾಗ, ಆ ನಿಮ್ಮ ಪ್ರಾರ್ಥನೆ ನಿಮ್ಮ ಜೀವನದ ಕೊನೆಯ ಪ್ರಾರ್ಥನೆ ಎಂಬಂತೆ ಮಾಡಿರಿ. (ಸಹೀಹ್ ಬುಖಾರಿ) ಎಂದು ಹೇಳಿರುತ್ತಾರೆ. ಈ ಹದೀಸ್ ಪ್ರಾಮಾಣಿಕತೆ, ಭಕ್ತಿ ಮತ್ತು ಸಾವಧಾನತೆಯೊಂದಿಗೆ ಪ್ರಾರ್ಥನೆಗಳನ್ನು ನಿರ್ವಹಿಸಬೇಕಾದ ಬಗೆ ಸ್ಪಷ್ಟ್ರ ನಿರ್ದೇಶನವನ್ನು ನೀಡುತ್ತದೆ ಹಾಗೂ ಆಧ್ಯಾತ್ಮಿಕ ಅನುಭವದಿಂದ ದೂರವಾಗುವಂತಹ ಯಾವುದೇ ಗೊಂದಲಗಳನ್ನು ತಪ್ಪಿಸುವಂತೆ ನಿರ್ದೇಶಿಸುತ್ತದೆ.
ಕುರಾನ್ ಹಾಗೂ ಹದೀಸಿಗಳ ಈ ಬೋಧನೆಗಳಲ್ಲಿ, ಮಸೀದಿಗಳ ಪವಿತ್ರತೆಯನ್ನು ಎತ್ತಿಹಿಡಿಯುವುದು ಮತ್ತು ನಮ್ಮ ನಡವಳಿಕೆಗಳು, ಈ ಪವಿತ್ರ ಸ್ಥಳಗಳಿಗೆ ನಾವು ಕೊಡುವ ಗೌರವಾಧಾರಗಳ ಪ್ರತಿಬಿಂಬಗಳು ಎನ್ನುವುದನ್ನು ನಾವು ಮರೆಯಬಾರದು. ಮಸೀದಿಗಳಲ್ಲಿ ನಿಷ್ಫಲ ಹರಟೆಯಲ್ಲಿ ತೊಡಗುವುದು, ಮೊಬೈಲ್ ಸಾಧನಗಳನ್ನು ಬಳಸುವುದು, ವಾಟ್ಸಪ್ಪ್ ಹರಟೆಯಲ್ಲಿ ತೊಡಗುವುದು ಅಥವಾ ಪ್ರಾರ್ಥನೆಯ ಸಮಯದಲ್ಲಿ ಯಾವುದೇ ರೀತಿಯ ಅನಾವಶ್ಯಕ ಚಟುವಟಿಗಳಲ್ಲಿ ತೊಡಗುವುದರಿಂದ, ಓರ್ವ ವಿಶ್ವಾಸಿಯ ಆರಾಧನೆಯಿಂದ ದೂರ ಸರಿಯುವನು ಮಾತ್ರವಲ್ಲದೆ, ಇತರರ ಆಧ್ಯಾತ್ಮಿಕ ಪ್ರಯತ್ನಗಳಿಗೆ ಕುಂದು ತರುವುದು.
ರಂಜಾನ್ ನಲ್ಲಿ ತರಾವೀಹ್ ಪ್ರಾರ್ಥನೆಗಾಗಿ ಒಟ್ಟುಗೂಡುತ್ತಿರುವಾಗ, ಪ್ರವಾದಿ ಮುಹಮ್ಮದ್ (ಸ) ಕಲಿಸಿಕೊಟ್ಟ ಉದಾತ್ತ ಮಾದರಿಯನ್ನು ಅನುಕರಿಸಲು ನಾವು ಶ್ರಮಿಸೋಣ ಮತ್ತು ನಮ್ರತೆ, ವಿನಮ್ರತೆ ಮತ್ತು ಭಕ್ತಿಯಿಂದ ನಮ್ಮ ಪ್ರಾರ್ಥನೆಗಳನ್ನು ಸಮೀಪಿಸೋಣ. ನಮ್ಮ ಮಸೀದಿಗಳಲ್ಲಿ ಶಾಂತಿ ಮತ್ತು ಗೌರವದ ವಾತಾವರಣವನ್ನು ಸೃಷ್ಟಿಸಲು ನಾವೆಲ್ಲರೂ ಕೊಡುಗೆ ನೀಡೋಣ, ಅಲ್ಲಿ ಹೃದಯಗಳು ಆರಾಧನೆಯಲ್ಲಿ ಒಂದಾಗುತ್ತವೆ ಮತ್ತು ಆತ್ಮಗಳು ಅಲ್ಲಾಹನ ಸ್ಮರಣೆಯಲ್ಲಿ ಉನ್ನತಿಗೊಳ್ಳುತ್ತವೆ ಎಂಬುದನ್ನು ಮರೆಯದಿರೋಣ.
✍️ಇಸ್ಮಾಯಿಲ್ ಎಸ್, ನ್ಯಾಯವಾದಿ.
