✍️. ಸಫಾ ಸುರಲ್ಪಾಡಿ
ಮಂಗಳೂರು: ಬೆಂಗಳೂರಿನಿಂದ ರಾತ್ರಿಯಿಡೀ ಸುಮಾರು ಎಂಟು ಗಂಟೆಗಳ ಪ್ರಯಾಣ ಮಾಡಿ ಬರುವ ನೂರಾರು ಪ್ರಯಾಣಿಕರು ಪ್ರತಿದಿನ ಮುಂಜಾನೆ ನಗರದ ಜ್ಯೋತಿ ಬಸ್ ನಿಲ್ದಾಣದಲ್ಲಿ ಇಳಿಯುತ್ತಾರೆ. ಆದರೆ ಬಸ್ ಇಳಿದ ತಕ್ಷಣ ಅವರಿಗೆ ಎದುರಾಗುವುದು ಶೌಚಾಲಯದ ಸಮಸ್ಯೆ.
ಜ್ಯೋತಿ ಬಸ್ ನಿಲ್ದಾಣದ ಬಳಿ ಸಾರ್ವಜನಿಕ ಶೌಚಾಲಯ ಇದೆ. ಆದರೆ ಪ್ರಯಾಣಿಕರಿಗೆ ಅತಿ ಹೆಚ್ಚು ಅಗತ್ಯವಿರುವ ಮುಂಜಾನೆಯ ಹೊತ್ತಿನಲ್ಲೇ ಅದಕ್ಕೆ ಬೀಗ ಜಡಿದಿರುತ್ತಾರೆ. ಹೀಗಾಗಿ ರಾತ್ರಿಯಿಡೀ ಪ್ರಯಾಣಿಸಿ ಬಂದ ಬಹುತೇಕ ಪ್ರಯಾಣಿಕರು ರಸ್ತೆ ಬದಿಯಲ್ಲಿ ಅಥವಾ ಬಸ್ ನಿಲ್ದಾಣದ ಹಿಂಭಾಗದಲ್ಲಿ ಮೂತ್ರ ವಿಸರ್ಜನೆ ಮಾಡಬೇಕಾಗಿದೆ. ಶೌಚಾಲಯ ಕಟ್ಟಡ ಇದ್ದರೂ ಬೇಕಾದ ಸಮಯದಲ್ಲಿ ಅದು ಜನರ ಉಪಯೋಗಕ್ಕೆ ಬರುತ್ತಿಲ್ಲ.
ಮಹಿಳೆಯರು, ಮಕ್ಕಳು, ಹಿರಿಯರ ಸಂಕಷ್ಟ
ಪುರುಷರು ಹೇಗೋ ರಸ್ತೆ ಬದಿಗೆ ಹೋಗುತ್ತಾರೆ. ಆದರೆ ಮಹಿಳೆಯರು, ಮಕ್ಕಳು ಮತ್ತು ಹಿರಿಯ ನಾಗರಿಕರ ಸ್ಥಿತಿ ಇನ್ನೂ ಕಷ್ಟಕರ. ದೀರ್ಘ ಪ್ರಯಾಣದ ಬಳಿಕವೂ ಶೌಚಾಲಯ ಸಿಗದೆ ಅವರು ಪರದಾಡುವಂತಾಗಿದೆ. ಮುಂಜಾನೆಯ ಕತ್ತಲಲ್ಲಿ ಬಸ್ ಇಳಿಯುವ ಮಹಿಳೆಯರಿಗೆ ಸುರಕ್ಷತೆಯ ಆತಂಕವೂ ಇದೆ.
ಸ್ವಚ್ಛತೆಗೆ ಧಕ್ಕೆ
ಪ್ರತಿದಿನ ಮುಂಜಾನೆ ನಡೆಯುವ ಬಯಲು ಮೂತ್ರ ವಿಸರ್ಜನೆಯಿಂದ ಜ್ಯೋತಿ ಬಸ್ ನಿಲ್ದಾಣದ ಸುತ್ತಮುತ್ತ ದುರ್ವಾಸನೆ ಹರಡುತ್ತಿದೆ. ಇದು ಸ್ಥಳೀಯರು, ಅಂಗಡಿ ಮಾಲೀಕರು, ಬೆಳಗಿನ ವಾಕಿಂಗ್ ಹೋಗುವವರು ಮತ್ತು ಪ್ರಯಾಣಿಕರಿಗೆ ಕಿರಿಕಿರಿ ಉಂಟುಮಾಡುತ್ತಿದೆ. ಸ್ಮಾರ್ಟ್ ಸಿಟಿ ಎನಿಸಿಕೊಂಡಿರುವ ಮಂಗಳೂರಿನ ಹೃದಯಭಾಗದಲ್ಲೇ ಇಂತಹ ಸ್ಥಿತಿ ಇರುವುದು ನಗರದ ಘನತೆಗೂ ಧಕ್ಕೆ ತರುತ್ತಿದೆ.
ಪ್ರಯಾಣಿಕರ ಬೇಡಿಕೆಗಳು
- ಬೆಂಗಳೂರಿನಿಂದ ಬಸ್‌ಗಳು ಬರುವ ಮುಂಜಾನೆಯ ಸಮಯದಲ್ಲೇ ಶೌಚಾಲಯ ತೆರೆದಿರಬೇಕು
- ಸಾಧ್ಯವಾದರೆ ದಿನದ 24 ಗಂಟೆಯೂ ಶೌಚಾಲಯ ಲಭ್ಯವಿರಬೇಕು
- ಸ್ವಚ್ಛತೆ ಕಾಪಾಡಲು ನಿರ್ವಹಣಾ ಸಿಬ್ಬಂದಿ ನೇಮಿಸಬೇಕು
ಮಹಿಳೆಯರಿಗೆ ಪ್ರತ್ಯೇಕ ಮತ್ತು ಸುರಕ್ಷಿತ ವ್ಯವಸ್ಥೆ ಇರಬೇಕು
ಅಧಿಕಾರಿಗಳು ಎಚ್ಚೆತ್ತುಕೊಳ್ಳುವರೇ?
ಪ್ರಯಾಣಿಕರಿಗೆ ಅಗತ್ಯವಿರುವ ಮುಂಜಾನೆಯ ಹೊತ್ತಿನಲ್ಲೇ ಶೌಚಾಲಯಕ್ಕೆ ಬೀಗ ಹಾಕಿದ್ದರೆ ಅದನ್ನು ಕಟ್ಟಿದ ಪ್ರಯೋಜನವೇನು ಎಂಬುದು ಪ್ರಯಾಣಿಕರ ಪ್ರಶ್ನೆ. ಮಂಗಳೂರು ಮಹಾನಗರ ಪಾಲಿಕೆ ಮತ್ತು ಸಂಬಂಧಪಟ್ಟ ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಂಡು, ಮುಂಜಾನೆಯಿಂದಲೇ ಶೌಚಾಲಯವನ್ನು ಜನರ ಬಳಕೆಗೆ ಮುಕ್ತಗೊಳಿಸಬೇಕು ಎಂಬುದು ಜನರ ಒತ್ತಾಯ.
