ಇಬ್ಬರು ಮಕ್ಕಳ ತಂದೆಯಾಗಿರುವ ಬಿಜೆಪಿಯ ನಾಯಕರೊಬ್ಬರು ಸಮಾಜವಾದಿ ಪಕ್ಷದ ನಾಯಕರೊಬ್ಬರ ಮಗಳೊಂದಿಗೆ ಓಡಿ ಹೋಗಿರುವ ಪ್ರಕರಣ ಉತ್ತರ ಪ್ರದೇಶದ ಹರ್ದೋಯಿ ನಗರದಲ್ಲಿ ನಡೆದಿದೆ.
ಹರ್ದೋಯಿ ನಗರ ಬಿಜೆಪಿ ಘಟಕದ ಪ್ರಧಾನ ಕಾರ್ಯದರ್ಶಿ ಆಶಿಶ್‌ ಶುಕ್ಲಾ ಈ ಪ್ರಕರಣದ ಆರೋಪಿ. ಯುವತಿಯ ತಂದೆ ದಾಖಲಿಸಿದ ಕೇಸು ಆಧರಿಸಿ,ತನಿಖೆ ಕೈಗೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.ಈ ವಿಷಯವನ್ನು ಬಿಜೆಪಿ ಗಂಭೀರವಾಗಿ ಪರಿಗಣಿಸಿದ್ದು, ಶುಕ್ಲಾ ಅವರನ್ನು ಪಕ್ಷದಿಂದ ಉಚ್ಚಾಟಿಸಿದೆ. ಎಂದು ಬಿಜೆಪಿಯ ಮಾಧ್ಯಮ ಉಸ್ತುವಾರಿ ಗಂಗೇಶ್ ಪಾಠಕ್ ಹೇಳಿದ್ದಾರೆ.
ಶುಕ್ಲಾ ಅವರು ಕೆಲ ವರ್ಷಗಳಿಂದ ಎಸ್.ಪಿ ನಾಯಕರೊಬ್ಬರ ಪುತ್ರಿಯೊಂದಿಗೆ ಸಂಬಂಧ ಹೊಂದಿದ್ದರು. ಇಬ್ಬರೂ ಕೆಲ ದಿನಗಳ ಹಿಂದೆಯೇ ಓಡಿ ಹೋಗಿದ್ದಾರೆ. ಅದು ಬುಧವಾರ ಬಹಿರಂಗವಾಗಿದೆ ಎಂದು ಮೂಲಗಳು ತಿಳಿಸಿವೆ.ವಿವಾಹಿತ ಶುಕ್ಲಾ ಅವರಿಗೆ 21 ವರ್ಷದ ಪುತ್ರ ಮತ್ತು ಏಳು ವರ್ಷದ ಪುತ್ರಿಯಿದ್ದಾರೆ.
ಕೇಸರಿ ಪಕ್ಷದ ಆಡಳಿತದಲ್ಲಿ ಹೆಣ್ಣು ಮಕ್ಕಳಿಗೆ ರಕ್ಷಣೆ ಇಲ್ಲದಂತಾಗಿದೆ. ಬಿಜೆಪಿಯ ಬೇಟಿ ಬಜಾವೊ ಘೋಷಣೆಯು ಕೇವಲ ಕಣ್ಣೊರೆಸುವ ತಂತ್ರ ಎಂದು ಸ್ಥಳೀಯ ಎಸ್.ಪಿ ಮುಖಂಡರು ಆರೋಪಿಸಿದ್ದಾರೆ.ಬಿಜೆಪಿ ನಾಯಕ ಶುಕ್ಲಾ ಅವರನ್ನು ಬಂಧಿಸದಿದ್ದರೆ ರಸ್ತೆಗಿಳಿದು ಪ್ರತಿಭಟನೆ ನಡೆಸುತ್ತೇವೆ ಎಂದು ಹರ್ದೋಯಿ ನಗರದ ಎಸ್.ಪಿ ನಾಯಕ ಜಿತೇಂದ್ರ ವರ್ಮಾ ಎಚ್ಚರಿಸಿದ್ದಾರೆ.
