✍️. ಇಸ್ಮಾಯಿಲ್ ಸುನಾಲ್ ವಕೀಲರು ಮಂಗಳೂರು
ಸಮುದ್ರದ ತಂಗಾಳಿಯು, ಇತಿಹಾಸದ ಪಿಸುಮಾತುಗಳನ್ನು ಮತ್ತು ವೈವಿಧ್ಯತೆಯ ಪ್ರತಿಧ್ವನಿಗಳನ್ನು ಹೊತ್ತ ಮಂಗಳೂರಿನ ಗದ್ದಲದ ಬೀದಿಗಳಲ್ಲಿ, ಕರುಣೆ ಮತ್ತು ಜ್ಞಾನೋದಯದ ಭದ್ರಕೋಟೆಯಾಗಿ ಸೇವೆ ಸಲ್ಲಿಸಿದ ಮಿಷನರಿ ಶಿಕ್ಷಣ ಸಂಸ್ಥೆಗಳ ಜಾಲವಿದೆ. ಮಿಷನರಿ ಶಾಲೆಗಳು, ಮಾದರಿ ಶಿಕ್ಷಣ ಸಂಸ್ಥೆಗಳಾಗಿ, ವಿದ್ಯಾರ್ಥಿಗಳ ಬದುಕನ್ನು ರೂಪಿಸುತ್ತ ಬಂದಿರುವುದನ್ನು ನಾವು ಕಾಣುತ್ತಿದ್ದೇವೆ. ಈ ಶಿಕ್ಷಣ ಸಂಸ್ಥೆಗಳು, ತಲೆಮಾರುಗಳವರೆಗೆ ಭರವಸೆಯ ದಾರಿದೀಪಗಳಾಗಿವೆ, ಶಿಕ್ಷಣ, ಸಾಮಾಜಿಕ ಮೌಲ್ಯಗಳನ್ನು ಕಲಿಸುತ್ತಿರುವ ಈ ಸಂಸ್ಥೆಗಳನ್ನು ಅರಿಯಬೇಕಾದರೆ, ನಾವು ಆ ಶಿಕ್ಷಣ ಸಂಸ್ಥೆಗಳ ಹೆಬ್ಬಾಗಿಲುಗಳ ಮೂಲಕ ಹಾದುಹೋಗಬೇಕಾಗುತ್ತದೆ. ಎಲ್ಲರನ್ನೂ ಸಮಾನವಾಗಿ ಕಾಣುವ, ಯಾರಲ್ಲೂ ಜಾತಿ, ಮತ ಭೇದ ಭಾವವನ್ನು ಮಾಡದ ಈ ಶಿಕ್ಷಣ ಸಂಸ್ಥೆಗಳು ಒಂದು ಅರ್ಥದಲ್ಲಿ ನಮ್ಮ ಜಿಲ್ಲೆಯನ್ನು ಬುದ್ಧಿವಂತರ ಜಿಲ್ಲೆಯಾಗಿಸಿದೆ ಎಂದರೆ ತಪ್ಪಲ್ಲ. ಆದಾಗ್ಯೂ, ಇತ್ತೀಚಿನ ಘಟನೆಗಳು, ಒಂದು ಸಮಾಜವಾಗಿ ನಾವು ಈ ಗೌರವಾನ್ವಿತ ಸಂಸ್ಥೆಗಳು ಸಮಾಜಕ್ಕೆ ನೀಡಿದ ಅಪಾರ ಕೊಡುಗೆಗಳನ್ನು ಮರೆತು ಬಿಟ್ಟಿದ್ದೇವೆಯೋ ಏನೋ ಎಂಬ ಭಾವನೆಯನ್ನು ಹುಟ್ಟು ಹಾಕಿದೆ ಎಂದರೆ ತಪ್ಪಾಗಲಾರದು.
ಈ ಶಿಕ್ಷಣ ಸಂಸ್ಥೆಗಳ ಉದಾತ್ತ ಪರಂಪರೆಯನ್ನು ನಿಕೃಷ್ಟವಂತೆ ಬಿಂಬಿಸುವ ಪ್ರಯತ್ನ ನಾಗರೀಕ ಸಮಾಜಕ್ಕೆ ಶೋಭೆ ತರುವಂತದ್ದಲ್ಲ.
ಒಂದು ಶಿಕ್ಷಣ ಸಂಸ್ಥೆಯ ಶಿಕ್ಷಕಿಯೊಬ್ಬರು ಧಾರ್ಮಿಕ ಸಂವೇದನಾಶೀಲತೆಯ ಮಾತುಗಳನ್ನು ಆಡಿದ್ದಾರೆ ಎನ್ನುವ ವಿಚಾರವನ್ನಿಟ್ಟುಕೊಂಡು, ಆ ಶಿಕ್ಷಣ ಸಂಸ್ಥೆ ಹಾಗೂ ಎಲ್ಲಾ ಶಿಕ್ಷಣ ಸಂಸ್ಥೆಗಳನ್ನು ಕಟಕಟೆಯಲ್ಲಿ ನಿಲ್ಲಿಸಿ, ನಾಗರೀಕ ಸಮಾಜಧ ಶಿಲ್ಪಿಗಳು ಎನ್ನಬಹುದಾದ ಶಿಕ್ಷಣ ಸಂಸ್ಥೆಗಳನ್ನು ದೂಷಿಸುತ್ತಿರುವುದು ಸರ್ವಥಾ ಸರಿಯಲ್ಲ ಎಂಬುವುದು ನನ್ನ ಭಾವನೆ. ಹಾಗಂತ ನಾನು ಯಾವುದೇ ಶಿಕ್ಷಕಿ ಒಂದು ಧರ್ಮದ, ಅಥವಾ ಧಾರ್ಮಿಕ ಭಾವನೆಗಳ ವಿರುದ್ಧವಾಗಿ ಮಾತನಾಡಿದ್ದರೆ ಅದನ್ನು ಸರಿ ಎನ್ನುತ್ತಿಲ್ಲ. ಯಾವುದೇ ಶಿಕ್ಷಕಿಯೂ ಆ ರೀತಿ ಮಾಡಬಾರದು ಹಾಗೂ ಮಾಡಿದ್ದರೆ ಅದನ್ನು ಒಪ್ಪಿಕೊಳ್ಳಲಾಗದು. ಯಾಕೆಂದರೆ ಅಂತಹ ಪ್ರಯತ್ನ ಧಾರ್ಮಿಕ ಸಾಮರಸ್ಯ ಕೆಡುವಂತೆ ಮಾಡಬಹುದು ಹಾಗೂ ವಿಭಜನೆಯನ್ನು ಹುಟ್ಟುಹಾಕಬಹುದಾಗಿದೆ. ಆದರೆ ಈ ವಿಚಾರವನ್ನು ಇಟ್ಟುಕೊಂಡು, ಪ್ರತಿಭಟನೆಗೆ ಇಳಿದು, ಆ ಶಿಕ್ಷಕಿ ಕಲಿಸುತ್ತಿದ್ದ ಶಾಲೆಯನ್ನು ಹಾಗೂ ಎಲ್ಲಾ ಮಿಷನರಿ ಶಾಲೆಗಳನ್ನು ಧೂಷಿಸುತ್ತಿರುವುದು ಖಂಡಿತ ಸರಿಯಲ್ಲ. ಶಿಕ್ಷಕಿಯ ವಿರುದ್ಧ ಆರೋಪಿಸಲಾಗಿರುವ ಆರೋಪಗಳ ಬಗ್ಗೆ ಸಂಭಂದಪಟ್ಟ ಶಾಲಾ ಮುಖ್ಯೋಪಾಧ್ಯಾಯನಿಗೆ ದೂರು ನೀಡಿ, ಈ ಬಗ್ಗೆ ತನಿಖೆಗೆ ಒತ್ತಾಯಿಸಿ, ತಪ್ಪಿತಸ್ಥೆಯ ವಿರುದ್ಧ ಸೂಕ್ತ ಕ್ರಮ ಜರುಗಿಸುವಂತೆ ಕೇಳಿ, ಅದಕ್ಕೆ ಅವರು ಒಪ್ಪದಿದ್ದರೆ ಪ್ರತಿಭಟನೆಗೆ ಇಳಿಯಬಹುದಿತ್ತು.
ಯಾಕೆಂದರೆ ಮಿಷನರಿ ಶಿಕ್ಷಣ ಸಂಸ್ಥೆಗಳು ಮಂಗಳೂರಿನ ಸಾಂಸ್ಕೃತಿಕ ವಸ್ತ್ರದ ಬಟ್ಟೆಯಲ್ಲಿ ಹೆಣೆದಿರುವ ದರ್ಜಿಗಳು ಮತ್ತು ಅವರ ಸೇವೆಯ ಪರಂಪರೆಯು, ಧರ್ಮ ಮತ್ತು ಸಿದ್ಧಾಂತದ ಗಡಿಗಳನ್ನು ಮೀರಿತ್ತು ಎಂಬುದನ್ನು ನಾವು ಮರೆಯಬಾರದು.
ಗೊಂದಲ ಮತ್ತು ವಿವಾದಗಳ ನಡುವೆ, ವೈಯಕ್ತಿಕ ಲಾಭಕ್ಕಾಗಿ ಸಮಸ್ಯೆಯನ್ನು ರಾಜಕೀಯಗೊಳಿಸಲು ಪ್ರಯತ್ನಿಸುರಿವುದನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಶಾಂತಿ ಮತ್ತು ಸಾಮರಸ್ಯವನ್ನು ಉತ್ತೇಜಿಸುವ ಬದಲು ಉದ್ವಿಗ್ನತೆಯನ್ನು ಉಲ್ಬಣಗೊಳಿಸುವಲ್ಲಿ ಸ್ಥಳೀಯ ಶಾಸಕರು ಸೇರಿದಂತೆ ಸ್ಥಳೀಯ ಮುಖಂಡರ ಪಾತ್ರ ದಯನೀಯ. ತಮ್ಮ ಕ್ಷೇತ್ರಕ್ಕೆ ಉತ್ತಮ ಮಾದರಿಯಾಗಬೇಕಾಗಿದ್ದವರು, ಪ್ರವಾಹದ ನೀರಿಗೆ ಬಲೇ ಹಾಕಿ ಮೀನು ಹಿಡಿಯುವ ಮೂಲಕ ತಮಗೆ ವೈಯುಕ್ತಿಕ ಲಾಭ ಮಾಡಿಕೊಳ್ಳುವ ಆಯ್ಕೆ ಮಾಡಿಕೊಂಡಿರುವುದು ವಿಷಾದನೀಯ.
ಈ ಕ್ಲಿಷ್ಟಕರ ಸಮಯದಲ್ಲಿ, ಈ ಶಾಲೆಗಳ ಇತಿಹಾಸದುದ್ದಕ್ಕೂ ಸಮಾಜಮುಖಿಯಾಗಿ ಕಾರ್ಯನಿರ್ವಹಿಸಿರುವ ಅವರ ಧ್ಯೇಯಗಳನ್ನು, ಮೌಲ್ಯಗಳನ್ನು ನೆನಪಿಟ್ಟುಕೊಳ್ಳುವುದು ಬಹಳ ಮುಖ್ಯ. ಸಹಾನುಭೂತಿ, ಪರಾನುಭೂತಿ ಮತ್ತು ಪರಸ್ಪರ ಸಹಬಾಳ್ವೆಯ ಮೂಲಕ, ಧಾರ್ಮಿಕ ಎಲ್ಲೆಗಳನ್ನು ಮೀರಿ, ವಿಭಿನ್ನ ನಂಬಿಕೆಗಳು ಮತ್ತು ಹಿನ್ನೆಲೆಗಳ ಜನರ ನಡುವೆ ತಿಳುವಳಿಕೆಯ ಸೇತುವೆಗಳನ್ನು ನಿರ್ಮಿಸುವ ಶಿಕ್ಷಣದ ಶಕ್ತಿಯ ಜ್ಞಾಪನೆಗಳಾಗಿ ಕಾರ್ಯನಿರ್ವಹಿಸುತ್ತಾ ಬಂದಿದ್ದಾರೆ ಎನ್ನುವ ವಿಚಾರವನ್ನು ನಾವು ಮರೆಯಬಾರದು. ಶಿಕ್ಷಣ ಮತ್ತು ಸಂವಾದದ ಮೂಲಕವೇ ನಮ್ಮನ್ನು ಒಡೆಯುವ ಬೆದರಿಕೆಯಿರುವ ವಿಭಜನೆಗಳನ್ನು ಜಯಿಸಲು ಮತ್ತು ಭವಿಷ್ಯದ ಪೀಳಿಗೆಗೆ ಹೆಚ್ಚು ಸಾಮರಸ್ಯ ಮತ್ತು ಅಂತರ್ಗತ ಸಮಾಜವನ್ನು ನಿರ್ಮಿಸಲು ನಾವು ಆಶಿಸಬೇಕು.
ಎದ್ದಿರುವ ಧೂಳು ನೆಲಕಚ್ಚಿ, ವಿವಾದದ ಪ್ರತಿಧ್ವನಿಗಳು ಮಸುಕಾಗುತ್ತಿದ್ದಂತೆ, ಮಂಗಳೂರಿನ ಮಿಷನರಿ ಶಾಲೆಗಳ ಬಗ್ಗೆ ಸಹಾನುಭೂತಿ ಮತ್ತು ನಂಬಿಕೆಯನ್ನು ಮರುಸ್ಥಾಪಿಸಿ, ನಾವು ನಮ್ಮ ಸಾಮಾಜಿಕ ಬದ್ಧತೆಯನ್ನು ಪುನರುಚ್ಚರಿಸಬೇಕಾಗಿದೆ. ನಾವು ಒಗ್ಗಟ್ಟಿನಿಂದ ಒಟ್ಟಿಗೆ ನಿಲ್ಲೋಣ, ವಿಭಜನೆಯ ಶಕ್ತಿಗಳನ್ನು ತಿರಸ್ಕರಿಸೋಣ ಮತ್ತು ನಮ್ಮ ಮಾನವೀಯತೆಯನ್ನು ವ್ಯಾಖ್ಯಾನಿಸುವ ಏಕತೆಯ ಮನೋಭಾವವನ್ನು ಅಳವಡಿಸಿಕೊಳ್ಳೋಣ. ಹಾಗೆ ಮಾಡುವ ಮೂಲಕ, ನಾವು ಈ ಗೌರವಾನ್ವಿತ ಸಂಸ್ಥೆಗಳ ಪರಂಪರೆಯನ್ನು ಗೌರವಿಸೋಣ. ಎಲ್ಲ ಸಮುದಾಯಗಳು, ಸಮಾಜ ಬಾಂಧವರು ಶಾಂತಿಯಿಂದ, ಅನ್ಯೋನ್ಯತೆಯಿಂದ, ಪರಸ್ಪರ ನಂಬಿಕೆಯಿಂದ, ಕೂಡುವುಕೆ ಹಾಗೂ ಸಹಬಾಳ್ವೆಯ, ಸಹಕಾರ ಮನೋಭಾವದಿಂದ, ನಮ್ಮ ಮುಂದಿನ ಪೀಳಿಗೆಗೆ ಅಡಿಪಾಯ ಹಾಕೋಣ ಎನ್ನುವುದೇ ಹಾರೈಕೆ.
