ಭಾರತದಲ್ಲಿ ತ್ರಿವಳಿ ತಲಾಖ್ ಕಾನೂನು ಬಾಹಿರ ಎಂಬ ಕಾನೂನು ಜಾರಿಯಲ್ಲಿದ್ದರೂ ಉತ್ತರ ಪ್ರದೇಶದ ವ್ಯಕ್ತಿಯೊಬ್ಬ ತನ್ನ ಪತ್ನಿಗೆ ತ್ರಿವಳಿ ತಲಾಖ್ ಕೊಟ್ಟಿದ್ದಾನೆ. ಸೌದಿ ಅರೇಬಿಯಾ ದೇಶದಲ್ಲಿ ಇದ್ದ ಪತಿರಾಯ, ಹೆಂಡತಿಗೆ ವಿಡಿಯೋ ಕಾಲ್ ಮೂಲಕವೇ ಮೂರು ಬಾರಿ ತಲಾಖ್ ಎಂದು ಹೇಳಿ ಸಂಬಂಧ ಕಡಿದುಕೊಂಡಿದ್ದಾನೆ.
ಪತ್ನಿ ಬ್ಯೂಟಿ ಪಾರ್ಲರ್‌ಗೆ ಹೋಗಿದ್ದಳು ಅನ್ನೋ ಕಾರಣಕ್ಕೆ ಪತಿ ಮಹಾಶಯ ಆಕೆಗೆ ತ್ರಿವಳಿ ತಲಾಖ್ ಕೊಟ್ಟಿದ್ಧಾನೆ. ಆಕೆ ಬ್ಯೂಟಿ ಪಾರ್ಲರ್‌ಗೆ ಹೋಗಿ ತನ್ನ ಹುಬ್ಬುಗಳನ್ನು ಸರಿಪಡಿಸಿಕೊಂಡಿದ್ದಳು. ಇದೊಂದೇ ಕಾರಣಕ್ಕೆ ಪತಿರಾಯ ಸಿಟ್ಟಿಗೆದ್ದಿದ್ದಾನೆ. ವಿಡಿಯೋ ಕಾಲ್‌ನಲ್ಲಿ ತನ್ನ ಪತ್ನಿಯ ಮುಖ ನೋಡಿ ಹುಬ್ಬುಗಳೇನು ಇಷ್ಟೊಂದು ಸುಂದರವಾಗಿದೆಯೆಲ್ಲಾ ಎಂದು ಪ್ರಶ್ನಿಸಿದ್ದಾನೆ. ಆಕೆ ತಾನು ಬ್ಯೂಟಿ ಪಾರ್ಲರ್‌ಗೆ ಹೋಗಿ ಹುಬ್ಬುಗಳನ್ನು ಸರಿಪಡಿಸಿಕೊಂಡೆ ಎಂದು ಹೇಳಿದ್ದೇ ತಡ, ಸಿಟ್ಟಿಗೆದ್ದ ಗಂಡ ಆಕೆಗೆ ಮೂರು ಬಾರಿ ತಲಾಖ್ ಹೇಳಿದ್ದಾನೆ ಎಂದು ತಿಳಿದು ಬಂದಿದೆ.
ತಿಂಗಳ ಹಿಂದೆ ಘಟನೆ ನಡೆದರೂ ತಡವಾಗಿ ವರದಿಯಾಗಿದೆ. ಪತ್ನಿ ಈ ಈ ಬಗ್ಗೆ ಪೊಲೀಸ್ ಠಾಣೆ ಮೆಟ್ಟಿಲೇರಿ ದೂರು ನೀಡಿದ ಹಿನ್ನೆಲೆಯಲ್ಲಿ ಪತಿರಾಯನ ಕೃತ್ಯ ಬೆಳಕಿಗೆ ಬಂದಿದೆ.
ಮುಸ್ಲಿಂ ವಿವಾಹ ಕಾಯ್ದೆಯ ಅನ್ವಯ ಸಂತ್ರಸ್ತ ಮಹಿಳೆ ಗುಲ್ಸಬಾ ಎಂಬುವರು ತಮ್ಮ ಪತಿ ಮೊಹಮ್ಮದ್ ಸಲೀಂ ವಿರುದ್ಧ ದೂರು ದಾಖಲಿಸಿದ್ದಾರೆ. ತ್ರಿವಳಿ ತಲಾಖ್ ಕೊಟ್ಟಿದ್ದಾರೆ ಅನ್ನೋದಷ್ಟೇ ಅಲ್ಲ, ತನ್ನ ಪತಿ ಹಾಗೂ ಆಕೆಯ ಕುಟುಂಬಸ್ಥರ ವಿರುದ್ಧ ಈ ಮಹಿಳೆ ವರದಕ್ಷಿಣೆ ಕಿರುಕುಳ ಆರೋಪವನ್ನೂ ಮಾಡಿದ್ದಾರೆ.
ಮೊಹಮ್ಮದ್ ಸಲೀಂ ತಮ್ಮ ಪತ್ನಿಗೆ ವಿಡಿಯೋ ಕಾಲ್ ಮಾಡಿದ್ದ. ಆಗ ತನ್ನ ಪತ್ನಿಯ ಹುಬ್ಬುಗಳನ್ನು ಗಮನಿಸಿ ಅಚ್ಚರಿಗೊಂಡಿದ್ದ. ಹುಬ್ಬುಗಳನ್ನು ಸರಿ ಮಾಡಿಕೊಳ್ಳಲು ಬ್ಯೂಟಿ ಪಾರ್ಲರ್‌ಗೆ ಹೋಗಲು ಅನುಮತಿ ಏಕೆ ಪಡೆದಿಲ್ಲ ಎಂದು ಪತಿರಾಯ ಸಿಟ್ಟಾಗಿದ್ದ. ನಂತರ ಇಬ್ಬರ ನಡುವೆ ವಾದ – ಪ್ರತಿ ವಾದ ನಡೆದಿದೆ. ಈ ವೇಳೆ ಕೋಪದ ಕೈಗೆ ಬುದ್ದಿ ಕೊಟ್ಟ ಮೊಹಮ್ಮದ್ ಸಲೀಂ ತನ್ನ ಪತ್ನಿಗೆ ಮೂರು ಬಾರಿ ತಲಾಖ್ ಎಂದು ಹೇಳಿದ್ದಾನೆ. ಅಷ್ಟೇ ಅಲ್ಲ, ಇನ್ನು ಮುಂದೆ ನೀನು ಸಂಪೂರ್ಣ ಸ್ವತಂತ್ರಳು. ಏನು ಬೇಕಾದರೂ ಮಾಡಿಕೋ ಎಂದು ಹೇಳಿದ್ದಾನೆ ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾಳೆ.
