ಔಷಧವು ವ್ಯವಹಾರವಾಗುತ್ತಿರುವ ಈ ಸಮಯದಲ್ಲಿ, ಕೇಂದ್ರ ಆರೋಗ್ಯ ಸಚಿವಾಲಯವು ಸಾಮಾನ್ಯ ಜನರಿಗೆ ಪರಿಹಾರ ನೀಡುವ ಹೊಸ ಮಾರ್ಗಸೂಚಿಗಳನ್ನ ಹೊರಡಿಸಿದೆ. ವೆಂಟಿಲೇಟರ್ ಜೀವ ಉಳಿಸುವ ಸಾಧನವಾಗಿರಬೇಕು, ಆದರೆ ಅದು ಆಸ್ಪತ್ರೆಗೆ ಆದಾಯ ತರುವ ಸಾಧನವಾಗಿರಬಾರದು ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಚಿಕಿತ್ಸೆಯ ಅವಧಿಯನ್ನು ಅನಗತ್ಯವಾಗಿ ವಿಸ್ತರಿಸುವುದು ಮತ್ತು ಕುಟುಂಬ ಸದಸ್ಯರನ್ನು ವೆಚ್ಚಗಳ ಬಗ್ಗೆ ಕತ್ತಲೆಯಲ್ಲಿಡುವುದು ಮುಂತಾದ ದೂರುಗಳನ್ನು ಆರೋಗ್ಯ ಸೇವೆಗಳ ನಿರ್ದೇಶನಾಲಯ ಗಂಭೀರವಾಗಿ ಪರಿಗಣಿಸಿದೆ.
ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆಯ ವೆಚ್ಚದ ಬಗ್ಗೆ ಹೆಚ್ಚುತ್ತಿರುವ ಕಳವಳಗಳನ್ನು ಗಮನದಲ್ಲಿಟ್ಟುಕೊಂಡು, ಆರೋಗ್ಯ ಸಚಿವಾಲಯದ ಅಡಿಯಲ್ಲಿ ಬರುವ ಆರೋಗ್ಯ ಸೇವೆಗಳ ಮಹಾ ನಿರ್ದೇಶನಾಲಯವು ಹೊಸ ನಿಯಮಗಳನ್ನು ರೂಪಿಸಿದೆ. ಹೊಣೆಗಾರಿಕೆ ಮತ್ತು ನೈತಿಕತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಇವುಗಳನ್ನು ಹೊರಡಿಸಲಾಗಿದೆ. ರೋಗಿಯನ್ನು ವೆಂಟಿಲೇಟರ್’ನಲ್ಲಿ ಇರಿಸುವ ಮೊದಲು, ಕುಟುಂಬ ಸದಸ್ಯರಿಗೆ ಸಂಪೂರ್ಣ ಮಾಹಿತಿ ನೀಡಬೇಕು. ಸ್ಥಿತಿಯ ವರದಿಯನ್ನು ತೋರಿಸಿ ಲಿಖಿತ ಒಪ್ಪಿಗೆಯನ್ನು ಪಡೆದ ನಂತರವೇ ಚಿಕಿತ್ಸೆಯನ್ನು ಪ್ರಾರಂಭಿಸಬೇಕು. ಆಸ್ಪತ್ರೆಯ ಆಡಳಿತ ಮಂಡಳಿಯು ಕುಟುಂಬ ಸದಸ್ಯರಿಗೆ ತಿಳಿಸದೆ ಅಥವಾ ಒಪ್ಪಿಗೆ ನೀಡದೆ ವೆಂಟಿಲೇಟರ್ ಬಳಸಿದರೆ, ರೋಗಿಯ ಕುಟುಂಬವು ವೆಚ್ಚವನ್ನು ಪಾವತಿಸಲು ಜವಾಬ್ದಾರರಾಗಿರುವುದಿಲ್ಲ.
ಉಸಿರಾಟದ ವೈಫಲ್ಯ, ಹೃದಯಾಘಾತ ಅಥವಾ ಗಂಭೀರ ಗಾಯಗಳಂತಹ ನಿರ್ದಿಷ್ಟ ಕಾರಣಗಳಿಗೆ ಮಾತ್ರ ವೆಂಟಿಲೇಟರ್ ಅನ್ನು ಬಳಸಬೇಕು. ಬಿಲ್ ಹೆಚ್ಚಿಸಲು ಮಾತ್ರ ಇದನ್ನು ಬಳಸಬಾರದು. ಚಿಕಿತ್ಸೆಯ ಅವಧಿಯನ್ನು ವಿಸ್ತರಿಸಬೇಕಾದರೆ, ಅದಕ್ಕೆ ಕಾರಣಗಳನ್ನು ವಿವರಿಸುವ ಹೊಸ ಒಪ್ಪಿಗೆಯನ್ನು ಕುಟುಂಬದಿಂದ ಪಡೆಯಬೇಕು. ಸಂಭವನೀಯ ವೆಚ್ಚಗಳನ್ನು ಮುಂಚಿತವಾಗಿ ಸ್ಪಷ್ಟಪಡಿಸಬೇಕು. 14 ದಿನಗಳಿಗಿಂತ ಹೆಚ್ಚು ಕಾಲ ವೆಂಟಿಲೇಟರ್ ಅಗತ್ಯವಿದ್ದರೆ, ಪರಿಸ್ಥಿತಿಯನ್ನು ಮೇಲ್ವಿಚಾರಣೆ ಮಾಡಲು ಆಸ್ಪತ್ರೆಯಲ್ಲಿ ವಿಶೇಷ ಲೆಕ್ಕಪರಿಶೋಧನೆ ಮತ್ತು ಪರಿಶೀಲನಾ ಸಮಿತಿ ಇರಬೇಕು. ದೂರುಗಳನ್ನು ಪರಿಹರಿಸಲು ಪ್ರತ್ಯೇಕ ಘಟಕವನ್ನು ಸ್ಥಾಪಿಸಬೇಕು.
ದೆಹಲಿ ಏಮ್ಸ್ ಮತ್ತು ಸಫ್ದರ್ಜಂಗ್ ನಂತಹ ಪ್ರತಿಷ್ಠಿತ ಆಸ್ಪತ್ರೆಗಳ ವೈದ್ಯರನ್ನು ಒಳಗೊಂಡ ತಜ್ಞರ ಸಮಿತಿಯ ಶಿಫಾರಸಿನ ಮೇರೆಗೆ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ದೇಶಾದ್ಯಂತ ಖಾಸಗಿ ಆಸ್ಪತ್ರೆಗಳ ವಿರುದ್ಧ ದೂರುಗಳು ಬಂದ ಹಿನ್ನೆಲೆಯಲ್ಲಿ ಈ ಬದಲಾವಣೆಗಳು ಬಂದಿವೆ.
